Необичното хоби на Марко Николовски - Хесус
Марко Николовски (Хесус), дигитален маркетинг агент, во слободно време музичар, продуцент и колекционер, кој има пасија за составување модели/фигурини од линијата на продукти на Bandai: Gunpla и FigureRise. Ова е ретко хоби кај нас, но тоа не значи дека за долго ќе е така!
Колку време составуваш вакви модели и како откри за нив?
Желба за составување на фигурини имам уште од многу мала возраст, од кога го добив првиот сет на LEGO од линијата на продукти Bionicle. После долг период се запознавам со Gundam светот и доаѓам до сознавање за ова хоби.
Фигурини составувам веќе 2 години, гледајќи и истражувајки за Gundam анимето ме донесе и до тој дел каде што открив дека има цело хоби околу ова. Исто покрај тоа дознав дека Bandai има и друга линија на фигурини за оставување од други аниме карактери и решив да почнам.
Колку време ти треба да составиш еден модел и колку големини има?
За една фигурина ми треба од недела до ден, зависи од големината и нивото на комплексност.
Имам еден модел за кој ми требаше цел месец да го составам. Големините се од 6 инчи до 12, тоа важи за Gunpla и за FigureRise. Мојата колекција ги содржи помалите поради естетика и компактност, но тоа не значи дека нема да земам големи во иднина.
За набавка може да се најде во Скопје, во стрип продавница Бункер, но имам нарачувано и онлајн преку Ali Express.
Дали познаваш и други луе тука кои го имаат истото хоби?
Луѓе кои го имаат ова хоби се многу ретки, јас познавам само еден од Скопје.
Ова хоби мене лично ми носи психички мир. За викенд рутина ми е да пуштам некој винил од мојата колекција и полека да ги склопувам фигурините без никој да ми смета, така да ги охрабрувам сите кои имаат љубопитност према ова хоби да му дадат шанса, без разлика дали се фанови на анимето или не.
